Lote sa merkado sa Tabunok iya sa gobyerno

CEBU, Philippines - Ang lote sa merkado publiko sa barangay Tabunok, dakbayan sa Talisay gipalit sa lokal nga kagamhanan sa siyudad gikan sa nasudnong kagamhanan ,matud ni Alma Abellanosa, hepe sa buhatan sa city assessor’s office.

Tungod niini nasuta ni Abellanosa nga iya sa kagamhanan sa Talisay ang maong lote.

Apan sukwahi sa pamahayag ni Abellanosa, may estorya usab nga ang maong lote gidonar o gihatag sa pamilyang Nacario ngadto sa kagamhanan sa Talisay aron mahimong merkado.

Unya kun dili na himoong merkado mihulga ang pamilyang Nacario sa pagbawi sa maong lote.

Nasayran nga ang merkado sa Tabunok gibahin og upat ka lote ug usa sa ka bahin niini gihangyo ni Gregorio Nacario nga paliton niya sa nasudnong kagamhanan apan walay mga papeles nga nagpakita nga nabayran niya kini.

Matud usab ni Abellanosa nga ang nahisgutang upat ka lote napalit sa kagamhanan sa Talisay niadtong Hunyo 16, 1915 ug niadtong tuig 1936 naluwatan kini og patent nga nagmatuod nga iya sa kagamhanan sa Talisay ang maong yuta.

Sa pagkakaron giutingkay sa mga vendor sa merkado sa Tabunok ang mga papeles sa pamilyang Nacario nga nagmatuod nga tag-iya usab sila sa maong lote.

Kun makita kini sa mga vendor, andam silang mobuhis sa ilang kinabuhi kay dili gyud sila mobalhin ngadto sa merkado sa Lagtang ug pakamatyan nila kini, sumala sa ilang bahad.

Ugma nalang kutob ang gitagal sa kagamhanan sa Talisay nga tak-opan na sa hingpit ang merkado sa Tabunok.

Nagkadusingot na ang mga vendor karon sa pagkinuykoyay sa mga papeles sa mga Nacario aron himoon nilang taming ngadto sa korte aron di kapugos ang kagamhanan sa Talisay pagpasira sa merkado sa Tabunok.

Kun wa silay makitang papeles ni Nacario, unsaon nalang. (BANAT NEWS)