Rama andam na sa iyang SOCA

CEBU, Philippines - Gipasalig ni Mayor Michael Rama nga dili siya manaway sa iyang mga kritiko atol sa pagpaabot unya niya sa iyang State of the City Address (SOCA) nga gikatakdang himuon sa unang bahin sa Hulyo.

Sumala pa sa mayor nga iya ra iyagyag ang mga nabuhat niyang mga proyekto sukad sa iyang paglingkod isip mayor ug iya usab ipasiatab ang mga maayo pa niyang mga plano alang sa nahibiling duha ka tuig sa iyang termino.

Nagkanayon si Rama nga daghan siya og gipangandoy alang sa kaayohan sa siyudad sa Sugbo busa dili siya magpaapekto kung makadungog siya nga dunay mosaway sa iyang administrasyon.

Una na nga gipadayag ni Bise Mayor Joy Augustus Young nga kinahanglan pa magpaabot si Rama og imbitasyon sa konseho kung makatambong ba kini o dili sa umaabot nga inaugural session karong Hulyo 6.

Nagpakahilom lang si Rama niini ug magpaabot lang siya sa resulta sa himuon niya nga tigom uban sa mga konsehal sulod niining semanaha.

Naandan na sa dakbayan nga awtomatikong imbitahon ang mayor sa konseho atol sa tinuig nga inaugural session. Apan karong mibiya na si Rama sa partidong gidominar karon sa konseho kaduha-duhaan pa kung imbitahon ba kini. (BANAT NEWS)