Mga opisyal sa Talisay nalipay

CEBU, Philippines -  Dili tiaw ang kalipay nga gibati sa mga opisyal sa kagamhanan sa dakbayan sa Talisay gumikan sa paghugop sa kaliboan ka tawo nga misalmot sa lumba sa dagan ug pananom og mga kahoy sa bukirang bahin sa maong syudad kagahapon sa buntag.

Si Vice Mayor Alan Bucao nagkanayon nga basta magkahiusa lang ang mga lider sa kagamhanan uban sa mga kawani niini ug sa sektor nga pribado, gaan kaayo ang kalamposan sa usa ka proyekto.

Ang lumba sa dagan ug pagpananom og mga lubangon sa mga kahoy sa kalasangan didto sa barangay Jaclupan, sa maong dakbayan gisalmotan sa kapin kun kulang 5,000 ka tawo.

Ang mga misalmot niini, mga kawani sa kagamhanan sa lalawigan sa dakbayan sa Talisay, mga sundawo, polis, estudyante, taga media ug sektor nga pribado kinsa nagpanon ug naghiusa sa pagpananom og mga kahoy sa usa ka upaw ug pang-as nga bahin sa Jaclupan.

Sila si konsehal Rodi Cabigas kinsa maoy tsirman sa komitiba sa infrastraktura ug konsehal Bernard Odilao sa komitiba sa environment kun kalikopan nagkanayon nga gibati sila og kahinangop sa nakita nilang bul-og sa katawhan nga puno sa kadasig nga wala panumbalinga ang kainit sa panahon ug kakapoy sa pagsalmot sa maong gimbuhaton. Ang maong proyekto gilusad sa Ramon Aboitiz Foundation Inc.(RAFI) nga gisuportahan usab sa kagamhanan sa tibuok lalawigan sa Sugbo.

Ang kalig-on sa suporta sa kagamhanan gipakita pinaagi sa pagtambong nila mismo ni Kongresista Eduardo Gullas sa unang distrito sa lalawigan sa Sugbo, Gobernador Gwen Garcia, Mayor Socrates Fernandez, mga opisyal sa DENR ug sa RAFI.

Si Vice Mayor Bucao, mga konsehal Cabigas ug Odilao mipadayag sa ilang pasalamat sa tanang misalmot sa maong kalihokan nga naghatag og dakong paglaom sa dugang kalamboan sa kalikopan sa Talisay nga gikinahanglan kaayo sa katawhan. (BANAT NEWS)