CEBU, Philippines - Gipasalig sa Department of Agriculture (DA).-7 nga pabiling abunda ang supply sa mga utanon ug isda sa kamerkadohan dinhi sa Sugbo ug sa tibuok Central Visayas taliwala ning gikataho nga pagsaka sa presyo niini karon.
Usa sa hinungdan niining pagsaka sa presyo sa isda ug mga utanon mao ang sunod-sunod nga pagkadaot sa panahon ilabi na karong anaa ang bagyong Falcon nga nakamugna og kusog nga hangin ug pag-uwan.
Gibutyag ni Grace Dagala ang tigpamaba sa DA-7 subay sa gihimo nilang monitoring sa presyo sa mga utanon ug isda sa kamerkadohan nga adunay mga mahalong klase sa isda nga kaniadto tag P180 ang kilo nahimo na karong P220 ang kilo.
Samtang ingon usab niini ang mga utanon nga sama sa presyo sa carrots nga tag P50 ang kilo, misaka kini og P10 ug nahimo nang tag P60 ang kilo.
Apan bisan pa niini gipasalig ni Dagala nga pabiling abunda ang supply sa isda ug mga utanon dinhi sa Sugbo ug sa tibuok rehiyon bisan pa sa pagsaka sa presyo niini gumikan kay adunay mga supplier gikan sa lain-laing lugar ang regular nga magtumoran og mga utanon ug isda dinhi sa Sugbo.
Dugang ni Dagala nga padayong gipanid-an nila ang presyo sa mga utanon ug isda sa kamerkadohan nunot ning nasinati nga dili maayong kahimtang sa panahon.
Nasuta usab sa DA-7 nga daghan sa mga mananagat ang wala mupogos sa pagpangisda niining mga semanaha gumikan sa dili maayong panahon nga nakamugna og kusog nga hangin ug bawod epekto sa bagyong Falcon. (BANAT NEWS)