Mga armas sa kanhi polis gikawat sa anak

CEBU, Philippines -  Usa ka retiradong polis nawagtangan sa iyang high-powered nga armas niadtong Biyernes sa ilang balay sa sitio Magsaysay, barangay Suba, dakbayan sa Sugbo ug mipasangil nga giunay kini og kawat sa iyang anak.

Si Retired Police Pedro Pangahin, 59, residente sa maong dapit mipasangil kang Renante Pangahin, 35, nga iya ra usab nga anak nga maoy mikuha sa iyang M16 riffle ug kalibre .45 nga pistola.

Si PO3 Celso Seville sa theft and robbery section sa Cebu City Police Office nagkanayon nga ang biktima mitaho kagahapon sa ilang buhatan nga nagkanayon nga pag-abot niya niadtong Biyernes sa ilang balay iya dayong gihiling ang iyang mga armas sa cabinet nga gisudlan niya niini, apan nahanaw na.

Si Pedro nagtrabaho isip private security sa usa ka Very Important Person (VIP) sa Manila ug niadto lang Biyernes siya nauli. Ang biktima kinsa kanhi personnel sa Presidential Anti-Organized Crime Task Force (PAOCTF) ubos sa Cebu City Police Office CCPO mibutyag sa kapolisan nga giadto niya ang iyang anak sa balay niini apan wala kini moatubang kaniya.

Si Pedro nagkanayon usab nga ang iyang asawa miangkon nga nakakita kini kang Renante nga maoy mikuha sa maong mga armas gikan sa cabinet.

Si Seville midugang nga adtoon nila ang balay sa tawo nga nakapalit sa maong mga armas. (Ug Niña G. Sumacot sa The Freeman/WC)(BANAT NEWS)