1 patay, 2 angol sa pagpamusil sa Talisay

CEBU, Philippines - Usa ang patay ug duha ang angol usa kanila menor de edad sa nahitabong pagpamusil kagahapon sa kaadlawon diha sa sitio Nonoc, barangay Tabunok, dakbayan sa Talisay.

Si Mark Saavedra,18, taga sitio Mahayag San Isidro nakaangkon og usa ka samad pinusilan sa tuong bahin sa iyang dughan diin ang bala milahos sa iyang buko-buko ug laing samad pinusilan sa tuong bahin sa iyang buko-buko diin ang bala miungot ngadto sa walang bahin sa iyang lawas nga maoy hinungdan sa iyang kamatayon.

Ang naangol mao ang 15-anyos nga taga sitio Mahayag, barangay San Isidro, Talisay kinsa nakaangkon og samad pinusilan sa tuong bahin sa iyang buko-buko ug naa pa karon sa Vicente Sotto Memorial Medical Center.

Lakip sa naangol mao si Carlo Cartalla, 19, taga sitio Tiago, San Isidro kinsa nakaangkon og samad pinusilan sa iyang bat-ang apan wala kini magpatambal sa mao niyang samad.

Sa imbestigasyon sa kapolisan nga ang mga biktima naglingkod duol sa usa ka basketball court uban sa ilang mga higala dihang usa ka grupo sa wa mailhing mga batan-on ang nabantayan nilang kaduha mibalik-balik og agi sa ilang gikahimutangan.

Tungod niini nanglakaw padulong sa sitio Tiago apan gisundan sila sa upat ka mga batan-on hinungdan nga gisitar kini ni Saavedra ug kaubang si Fredie Impales.

Apan duha sa upat ka gikatahapan miibot og pusil ug gipamusil ang mga biktima.

Duha ka anggulo karon ang gisubay sa kapolisan una mao ang suya tungod kay kauban sa pag-estambay sa mga biktima diha sa lugar ang duha ka mga babaye.

Ang sunod nga anggulo mao nga tripping lang sa mga namusil ang ilang gibuhat ilabi na nga usa sa mga biktima kanhi sakop sa fraternity. (BANAT NEWS)