Gullas ug Osmeña ok na?

CEBU, Philippines - Ang dili maayong relasyon sa duha ka dagkong pamilyang Gullas ug Osmeña sa Sugbo gituohang magkauli pinaagi sa gitukod ug gibuksan dili pa dugay nga JRG Halad Musuem.

Kini human ang tag-iya ug nagtukod sa JRG Halad Museum nga si Dr. Jose”Dodong” R. Gullas mihalad og “minilyon” nga pasalamat kang Konsehal Margot Osmeña gumikan sa pag-ila sa naulahi sa iyang paningkamot nga mapreserbar ang Sugboanong kultura ug sa pagbanhaw sa mga karaang musika ug komposisyong Sugboanon.

Kini isip usab pagpatagbaw sa hilabihang kalipay ug kamaya ni Dodong Gullas nga igsuon ni Kongresista Eduardo”Eddiegul” Gullas sa dakong nahimo ni Konsehal Osmeña.

Ang konsehal maoy kapikas sa kinabuhi ni Kongresista Tomas Osmeña kinsa maoy misumitir og resolusyon sa konseho sa dakbayan sa Sugbo sa pagdayeg kang Gullas gumikan sa dakong tabang niini sa kulturang Sugboanon pinaagi sa gibuksang JRG Halad Museum.

Mahinumdoman nga sila si Kongresista Eduardo “Eddiegul” Gullas sa unang distrito sa lalawigan sa Sugbo ug Kongresista Osmeña sa habagatang distrito sa dakbayan sa Sugbo nagkabangi kaniadto sa isyu nga may labot sa South Road Properties.

Gituohan karon sa mga tigpaniid nga ang JRG Halad Museum ug ang gipakitang kaayo ni Konsehal Osmeña pagdayeg niini maoy mamahimong dalan aron magkauli sa maayong kabubut-on sa duha ka mga dagko ug inilang politiko sa Sugbo.

Ang pagdayeg o komendasyon ngadto kang Gullas gihimo pinaagi sa usa ka resolusyon ni Konsehal Osmeña kinsa maoy pangulo sa tourism and culture committee sa konseho.

Ang babayeng Osmeña mitambong atol sa pormal nga pagsubo ug pagbukas sa JRG Halad Museum niadtong miaging Hunyo 13, 2011.

Gikinahanglan natong pasidunggan ug dayegon si Ginoong Gullas gumikan sa pagtukod sa JRG Halad Museum, matud pa sa resolusyon.

Gihulagway ni Osmeña nga ang maong museum mao ray bugtong museum sa mga awit Sinugboanon ug Binisaya dinhi sa Pilipinas.

Si Konsehal Osmeña naglaraw nga irekomendar ang nahisgutang museum ngadto sa Department of Education (DepEd) pinaagi sa Cultural and Historical Commission.

Kini tungod kay alang sa konsehala nga ang JRG Halad Museum mahimong usa ka dapit diin maghatag og dugang kaalam ug kahibalo sa mga tinun-an.

Tungod kay anaa sa maong museum ang tanang halandomon ug karaang mga awit Binisaya ug Sinugboanon nga gisuwat sa mga karaang kompositor og kanta, ug mga awit nga gititikan sa mga banggiitang   artista sa awit nga Sugboanon.

“Ang JRG Halad Museum nahilinya sa mga gipaningkamotan sa kagamhanan sa dakbayan sa Sugbo nga mapreserba ang kulturanhong dungog ug garbo sa Sugbo,” dugang pang mga teksto sa nahisgutang resolusyon.

Usa sa makita sa JRG Halad Museum mao ang Halad Music Gallery nga nagpasundayag sa mga inilang kompositor sa Binisaya ug Sinugboanong mga awit niining ika-20 ka siglo kinsa nakagama na og mga inilang kanta nga walay kamatayon, mga bahandianong awit nga wala kaayo ma-inila, ingon man sa mga artista kinsa nahimong bantogan sa mga eksena nga pang-international  gumikan sa ilang abilidad.

Anaa sa JRG Halad Museum ang mga orihinal pa nga mga nota sa kanta uban sa mga instrumento sa musika nga gigamit mismo sa mga kompositor, lakip na ang nagkalain-laing mga award o mga pasidungog ug mga instrumento sa musika sa mga artists sama sa mga gown ug uban pang kahimanan sa pag-awit nga maoy gigamit sa mga artist.

Ang mga mobisita sa museum mahimong makapaminaw usab sa mga Sugboanong mga awit gikan sa mga karaang ponograpo ngadto na sa binag-ong digital music station.

Anaa usab sa maong museum ang Kinaiyang Sugboanon Gallery ug ang Jose R. Gullas Memorabilia Gallery nga gibutang diha sa JRG Halad Museum building nahimutang sa eskina sa mga dalan V. Gullas ug D. Jakosalem nga mao ang kanhi buhatan sa The Freeman ug Banat News.

Si Gullas sa sayo pa nagkanayon nga ang maong museum gihalad ngadto sa ilang mga ginikanan nga sila Don Vicente “Papa Inting” Gullas ug Lady Josefina “Mama Pining” Rivera Gullas.

Matud pa niya nga ang museum maoy magsilbing butanganan sa mga bahandianong awit sa Kabisay-an ilabi na sa Sugbo, lakip na sa mga ngalan ug hulagway sa mga kompositor, artista ug uban pang memorabilia ingon man destinasyon sa mga puno na sa kasinatian sa mga awit nga Sinugboanon sa mga pasundayag sa arte, kulturanhong dungog ug exhibition.

Ang JRG Halad Museum bukas gikan sa Lunes hangtod Biyernes sa alas 9:00 sa buntag hangtod sa alas 5:00 sa hapon ug sa mga adlaw’ng Sabado ug Domingo kun may reserbasyon.

Ang mga Senior Citizen libre sa pagsulod sa maong museum ug sa dugang mga kasayoran mahimong tawagon ang telepono (032)268-2579. (BANAT NEWS)