Rama mi-deny nga giduol sa oposisyon

CEBU, Philippines -  Gihimakak ni Mayor Michael Rama ang migawas nga report nga matud pa giduol na siya sa mga sakop sa oposisyon aron makig-alyansa alang sa umaabot nga piniliay karong 2013.

Gitataw sa mayor nga dunay mga okasyon nga dili malikayan nga magkaabot sila sa pipila ka mga personalidad gikan sa oposisyon ug usa na niini mao ang pagkatagbo nila ni kanhi mayor Alvin Garcia ug uban pa nga mga kaalyado niini sa birthday party sa kapitan sa Barangay Sambag Uno nga si Jerry Guardo.

Matud pa sa mayor nga dili kini angayang himuong isyu sanglit giimbitar lang siya sa maong kalihukan ug dili niya sala kung magkaabot sila sa mga kaalyado sa oposisyon partikular sa grupong Kugi Uswag Sugbo (Kusog).

Iyang giklaro nga wala siya nagporma og grupo sa politika gumikan kay nakatutok karon ang iyang atensyon sa trabaho.

Mapasalamaton hinuon si Rama ngadto sa oposisyon nga mga kapitan nga mipadayag og suporta sa iyang administrasyon usa na niini mao ang kapitan sa barangay Punta Princesa nga si Jose Navarro.

Si Navarro nailhan na sukad kaniadto nga kritiko ni Kongresista Tomas Osmeña. Si Osmeña ug Rama dili na maayo ang relasyon ug misangko na sa pagbiya sa mayor sa BOPK.

Gitataw sa mayor nga mohangop siya sa mga kapitan nga mokooperar sa iyang administrasyon sanglit alang raman usab kini sa katawhan.

Matud pa niya nga patas ang paghatag niya og mga proyekto ngadto sa nagkadaiyang barangay ug wala niya huna-hunaa ang politika sa pag-umol niya og mga maayong programa alang sa katawhan. (BANAT NEWS)