Ipong miduso'g motion

CEBU, Philippines - Ang kanhi prinsipal sa Talisay City Central School nga si Maria Lourdes Ipong miduso og motion for reconsideration ngadto sa Ombudsman Visayas bahin sa kasong malversation of public funds ug falsification of official documents nga gisang-at batok kaniya sa grupo Talisay City Swimming and Life Saving Association Inc. (TCSLSAI).

Kini human ikapagawas sa Ombudsman Visayas ang desisyon sa maong kaso niadtong Marso 16, 2011 nga nagmando kang Regional Director Recaredo Borgonia, sa Department of Education (DepEd)-7 sa pag-implementar sa maong desisyon.

Ang kaso nanukad dihang si Alfie Fernandez sa TCSLSAI mipasangil nga si Ipong nanabi nga walay pundo ang kagamhanan sa Talisay alang sa mga swimsuit sa mga swimmer hinungdan nga ang mga ginikanan sa mga swimmer mao nay mipalit og mga swimsuit gamit ang ilang kaugalingong kwarta niadtong tuig 2006.

Apan matud ni Fernandez nga sa ilang pakisusi si Ipong nakadawat diay og P12,600 gikan sa kagamhanan sa siyudad alang sa kalihokan sa mga atleta.

Niadtong Martes ang iyang abogado nga si Manlalaban Nestor G. Avila miduso dayon og MR sa maong kaso.

Ang prayer sa maong MR nanghinaot nga ika-dismiss ang maong kaso tungod sa kakuwang niini og merito.

Samtang si Ipong mihimakak sa maong mga pasangil kaniya tungod kay diha sa iyang hunahuna nga ang tseke nga balor og P12,600 gituohan niyang usa kadto ka refund sa mga nagasto niya sa mga nanglabay’ng kalihokan sa mga atleta.

Si Ipong mipasangil nga ang Assistant Division Superintendent nga si Ofelia Hermosa maoy nagpaluyo sa tanan ug gani matud niya nga mao kini nangapud-apod sa kopya sa desisyon sa Ombudsman batok kaniya, kini tungod kay matud pa niya may kasuko ang maong opisyal kaniya.

Gumikan niini mibahad si Ipong nga mosumbalik siya pagpasaka og kaso kang Hermosa ug sa grupo sa TCSLSAI kinsa usa sa miyembro niini nga si Roland Remolino igsoon ni Hermosa.

Ang Banat News napakyas kagahapon sa pagkuha og pamahayag ni Hermosa tungod kay dili kini motubag dihang gisuwayan og tawag ang mga numero sa iyang cellular phone.   - BANAT NEWS