Tawong kublan wa dutli sa bala

CEBU, Philippines - Usa ka mini bus driver nga gidudahang may anting-anting wala madutli sa bala sa .45 kalibreng pistola sa dihang gipusil kini sa laing drayber didto sa highway sa Sityo Lacaron barangay Pitalo lungsod sa San Fernando niadtong Martes sa buntag.

Ang maong kublan giila nga si Roed Cabrera, 33, minyo, nga taga San Isidro, San Fernando ug drayber sa mini bus sa rota nga Carcar- Cebu City.

Samtang ang suspek mao si Carry Orot, hingkod, minyo, nga taga Sityo Kamagayan, barangay Perelos siyudad sa Carcar ug drayber sa multicab nga pasaheroan.

Si Insp. Dexter Basiro, deputy chief sa San Fernando Police dihang nahinabi sa Banat News mibutyag nga ang biktima ug suspek nagkalalis niadto pang Sabado gumikan sa inilogay nila sa mga pasahero.

Apan niadtong Martes sa buntag gi-atangan sa suspek ang biktima sa maong lugar nga namasahero niadtong higayona ug gipahunong kini ug gipusil apan igo lang miaso ang iyang dughan dapit sa totoy. Dayon natagak ang bala ug igo lang milagom ang naig-an niining panit.

Hinungdan nga mikaretil og dagan ang suspek ug misibat sakay sa iyang multicab pahilayo sa maong lugar.

Pag-abot didto sa Sityo Campawog barangay Pitalo, giparking sa suspek ang maong multicab ug gibiyaan kini.

Samtang ang biktima igo lang nagpakorasyon sa iyang bun-og sa dughan nga agi sa bala sa armas nga wala makadot.

Matud ni Insp. Basirgo nga napunitan nila sa crime scene ang usa ka tingga sa bala nga wala makasamad sa dughan sa biktima.  - BANAT NEWS