13 ka trak gidakop

CEBU, Philippines - Gitug-an sa buhatan sa Provincial Treasurer nga miabot na og 13 ka mga trak de karga ang ilang nadakpan human gihingusgan sa pagpatuman ni Gov. Gwendolyn Garcia ang road load limit aron mapreserbar ang mga kadalanan nga giatiman ug gipanindot sa kagamhanan sa probinsiya sa Sugbo.

Matud pa ni Provincial Treasurer Roy Salubre nga sagad sa nadakpang mga dump trucks nag-overload sa ilang gikargang mga filling materials gikan sa quarry sites.

Si Salubre miingon nga daghan usab sa nadakpan nga mga dagkong trak may kakulian sa ilang mga delivery receipts kay ang uban walay petsa samtang ang uban ginamit na ang mga dokumento.

Gitug-an ni Salubre nga ang mga dinakpan pamultahon og P10 mil sa unang kalapasan, P20 mil sa ikaduhang higayon ug sa ikatulo pagkumpiskar sa ilang mga sakyanan.

Hinuon iyang giklaro nga wala pa hinuoy mga sakyanan nga nakalapas sa ikaduha nga higayon.

Subay niini, gitambagan ni Salubre ang mga quarry operators nga tumanon ang lagda nga ilang gipatuman sanglit ang lalawigan kanunay nga mohimo og mga lakang aron masiguro nga wala gilapas sa mga operators ang mga palisiya nga gisitar sa kapitolyo.  - BANAT NEWS