Duha ka tawo gipanunggab angol

CEBU, Philippines -  Duha ka tawo ang nalandig sa tambalanan human panunggaba sa managlahing lugar ning dakbayan sa Sugbo sa miaging Domingo.

Ang mga biktima mao sila si Robert Trazona, 24, usa ka construction worker, nga taga sitio Talabera, Upper Greenbelt sa barangay Quiot, ug Michael Dacayanan, 37, usa ka pintor nga taga sitio Laure sa barangay Tisa.

Sumala sa kapolisan nga si Maria Luz , kapuyo ni Trazona mibutyag nga samtang nangatulog sila niadtong Domingo sa gabii may tawong nagpaninggit og “kinsay isog diri”.

Matud pa pagkadungog ni Trazona, mibangon kini ug miabli sa ilang pultahan dihang gisugat kini ni Jose “Joy” Villalona, 36, nga ilang silingan ug gihansakan sa ice pick ang lawas sa makadaghang higayon.

Gihatod siya ngadto sa Cebu City Medical Center (CCMC) nga nabulit ang kalawasan sa mga samad samtang ang suspetsado mitahan dayon ngadto sa kapolisan ug gipaslak sa prisohan.

Samtang si Dacayanan gikang nakig-inom sa iyang mga barkada sa sitio Calipay, barangay Punta Princesa dihang sa pagpauli niya sa ila, gisugat usab siya og dunggab sa wala hiilhing kriminal. (FREEMAN)