Roadside drug testing ipadayon

CEBU, Philippines -  Ipadayon sa Land Transportation Office (LTO)7 ang roadside drug testing sa mga drayber sa public utility jeepneys (PUJ) ug taxi dinhi sa dakbayan sa Sugbo aron madesiplina ang mga drayber nga tiggamitan og gidiling drugas.

Nunot niini gibaharan ni LTO-7 Regional Director Raul Aguillus ang mga drayber sa maong mga sakyanan nga masakpang molikay pag-agi sa mga dapit nga himoan sa drug testing nga mag-atubang og silot.

Kini tungod kay mahimong hinungdan sa pagkabara ug kalangay sa ilang mga pasahero kay mangita og laing agianan aron lang makalikay nga masayran tiggamitan sila og gidiling drugas.

Gipalanog kini ni Aguillus human mamatikdi niini nga momenus ang biyahe sa mga PUJ ug taxi sa rota nga pahigayonan nila sa roadside drug testing sa mga milabay’ng adlaw.

 Nangante ang director nga ipadayon gyud nila ang roadside drug testing aron pagsumpo niadtong mga drayber nga tiggamitan og gidiling drugas.

Samtang gipasabot ni Aguillus nga masuspenso ang lisensiya sa mga drayber sa PUJ ug taxi nga positibo sa paggamit og gidiling drugas sa milabay nilang mga roadside drug testing.

Ang gipaabot nalang nila mao ang resulta sa confirmatory test nga gipadala pa didto sa kaulohan.

Miingon si Aguillus nga sa higayong mogawas na nga positibo gyud ang resulta sa confirmatory test diha-diha i-revoke gyud ang linsesiya niini ug ipaubos sa rehabilitasyon ang maong drayber ug pagkahuman pa sa unom ka bulan siya tugotang makalukat pagbalik og lisensiya.(WC)(BANAT NEWS)