March rally ipahigayon
CEBU, Philippines - Usa ka march rally ipahigayon sa Cebu City Police Office agi og paila sa lig-on nga pakigbatok sa kapolisan sa ginadiling drugas karong Biyernes.
Si Director Melvin Ramon Buenafe mihangyo sa publiko nga salmotan nila kining maong march rally ug ipakita nila nga mosuporta sila sa kampanya batok sa illegal nga drugas.
Ang martsa gitakdang magsugod sa alas 3:00 sa hapon nga manukad sa upat ka lugar nga naglangkob sa Ayala Business Park, Capitol Ground, V. Rama ug sa atubangang bahin sa Abellana National School.
Ang martsa matapos sa Fuente Osmeña diin isunod dayon ang programa uban sa mga imbitadong local performer.
Usa sa giatngan nga mopasundayag mao ang “Libud-Suroy Children” kinsa mosaway sa mga buhat sama sa paggamit sa ginadiling drugas. Motambong usab sa maong kalihukan ang kontrobersyal nga anak ni Talisay City Mayor Socrates Fernandez nga si Joavan Fernandez.
Gilauman ni Buenafe nga kaliboan ka mga tawo ang motambong sa maong kalihukan gikan sa nagkadaiyang sektor.
Pipila sa motambong niini mao ang mga sakop sa Association of Barangay Captains nga gipangulohan ni konsehal Michael Ralota. Giimbitar usab ang pipila ka mga tinun-an sa nagkadaiyang unibersidad sa siyudad sa Sugbo. (BANAT NEWS)
- Latest
- Trending
