Kapolisan gipaalerto sa kagubot

CEBU, Philippines -  Gipaalerto sa officer-in-charge sa lungsod sa Compostela ang mga polis sa lungsod sa Compostela tungod sa mga hungihong nga mohimo na usab og protest rally ang grupo ni mayor-elect Joel Quiño.

Ang director sa Department of Interior and Local Government (DILG) 7 kinsa mao karoy officer-in-charge sa maong lungsod nga si Pedro Noval maoy miluwat og kamandoan sa kapolisan sa pagmabinantayon sa paglikay nga masubli pa ang maong hitabo sa maong lungsod.

Si Noval nga nahinabi sa Banat News sa telepono miingon nga ang kapolisan sa maong lungsod nga gipangulohan sa hepe nga si Senior Inspector Allan Rosario iyang gipahimangnoan nga magmabinantayon kanunay alang sa pagmentinar sa kahapsay ug kalinaw sa maong lungsod.

Gitataw ni Noval nga sa miagi pang semana nilang nadawat ang mga huhungihong labot sa subli nga pagpahigayon og protest rally sa grupo ni Quiño hinungdan sa pagluwat niya sa maong pahimangno.

Dugang pa ni Noval nga gawas sa mga tropa sa kapolisan sa lalawigan ug mga sakop sa Special Reaction Unit (SRU) sa kapolisan sa Cebu Provincial Police Office (CPPO) iyang gipaandam usab ang kapolisan sa silingang mga lungsod sama sa Consolacion ug Liloan. “On call ang mga polis sa silingang lungsod sa higayon nga matinuod ang gihuhungihong nga protest rally,” nagkanayon si Noval.

Si Noval miingon nga niadtong unang protest rally nga nahitabo sa miaging bulan adunay mga huhungihong labot sa protest rally nga mahitabo apan wala lamang kini hatagi og gibug-aton hangtod nga dihang natinuod nahimo na hinuon nga problema. (EIM)(BANAT NEWS)