Duha nakalas sa aksidente sa Mandaue

CEBU, Philippines - Patay ang duha ka tawo nga angkas sa motorsiklo human kini gibagnos sa usa ka taksi ang ilang gisakyang motorsiklo diha sa dalan M.C. Briones sa barangay Basak dakbayan sa Mandaue kagahapon sa kaadlawon.

Ang mga nakalas mao si Daisy Mae Masecampo, 21, residente sa barangay Lahug sa dakbayan sa Sugbu ug Erwin Ramirez, 30, samtang naangol usab ang nagmaneho sa motorsiklo nga si Jeffrey Bungo, 20, nga residente sa barangay Jugan, Consolacion.

Giimbestigar ug posibleng pasakaan og kaso ang drayber sa MJ Taxi nga si Jaime Donaire, 40, residente sa barangay Alang-alang dakbayan sa Mandaue.

Sa pasiunang report sa traffic division sa kapolisan sa Mandaue nasuta nga samtang nagdagan ang motorsiklo ug ang taksi sa usa lamang ka direksiyon padulong sa Consolacion mga 1:50 kagahapon sa kaadlawon sa maong dapit kalit nga mihunong ang taxi.

Matod pa ni Bungo wala siya makabantay nga kalit mi U-turn ang taksi hinungdan nga naigo sa dulong sa taksi ug nabagnos sila sa dalan.

Ang kapolisan mibanabanang moabot sa 81- metros ang gilay-on sa gibagnosan sa mga biktima hinungdan sa ilang pagkahiagom sa mga samad ug bun-og sa kalawasan.

Si Bungo ug Masecampo gidali og dala sa mga sakop sa Emergency Rescue Unit Foundation (ERUF) sa Mandaue City Hospital, samtang si Ramirez gidala sa Vicente Sotto Memorial Medical Center.

Si Donaire mitahan sa iyang kaugalingon sa kapolisan ug miangkon sa maong salaod nga iyang nahimo ngadto sa mga biktima.

Gumikan sa ilang nahiaguman nga samad ug bun-og sa kalawasan wala makaantos si Masecampo ug namatay sa Mandaue City Hospital, samtang si Ramirez nakabsan usab sa kinabuhi sa VSMMC.

Ang maong kamatayon sa duha gikumpirmar kini nila ni Maricar Masecampo ang inahan ni Daisy ug ni Eric Ramirez nga igsuon ni Erwin ngadto sa kapolisan sa dakbayan sa Mandaue.

Kasong reckless imprudence resulting to homicide and damage to property and physical injuries ang atubangong kaso ni Donaire. (BANAT NEWS)