V-hire nahagbong sa bung-aw 15 angol

CEBU, Philippines - Pulos nangaangol ang 15 ka mga pasahero sa V-Hire van lakip na ang drayber nga mao say tag-iya sa maong sakyanan human mahagbong sa bung-aw kagahapon sa hapon sa barangay Babag I, dakbayan sa Sugbo.

Sumala pa sa mga alegasyon nakatulog ang drayber nga si Rustom Tundag, 35-anyos nga taga lungsod sa Balamban. Si Tundag nagmulo sa kasakit sa iyang abaga tungod sa nahitabo.

Base sa report sa DYAB nga ang tanang mga nangaangol gidala ngadto sa Cebu Doctors Hospital sa dakbayan sa Sugbo. Atol ning pagsulat sa balita wala pa makahatag og pangalan ang City Traffic Office Management (CITOM) nga maoy nag-imbestigar sa maong aksidente.

Usa sa mga pasahero nga si Judy Mea Rosales, 25, mibutyag nga diha siya maglingkod dapit sa likod sa drayber ug nakatulog siya sa ilang biyahe.

Apan iyang namatngunan nga nagsininggitay na ang iyang mga kaubang pasahero ug ang usa ka pasahero nga tapad sa drayber nasuko ngadto sa drayber tungod kay giingong nakatulog kini sa iyang pagmaneho.

Ang sunod nga nahitabo mao nga nadat-ogan na siya sa ubang mga pasahero nga kalit nangahan-ok padulong ngadto sa atubangan lakip na sa mga lingkuranan.

Si Rosales mibutyag usab nga na-shock na siya dihang duna na siya’y nakitang mga dugo ug ang bintana sa sakyanan gibuak na nila aron sila makagawas sa van. Ang van gikan sa terminal sa Balamban paingon sa dakbayan sa Sugbo apan pag-abot sa maong dapit misimang sa dalan ang van ug naigo sa punoan sa Narra ug nalahos og kahagbong. (BANAT NEWS)