CEBU, Philippines - Samad pinusilan sa ulo ang hinungdan sa kamatayon sa usa ka babaye nga gituohang biktima sa salvage nga napalgang patay sa kasagbutan sa sitio Puso, barangay Mactan sa dakbayan sa Lapulapu kagahapon sa buntag.
Ang maong babaye nga hangtod ning pagbalita wala pa mailhi, gibanabana nga 30-anyos kapin ang panuigon, gibana-banang 5’3” ngadto sa 5’4” pulgadas ang gitas-on, nagsuot of T-shirt nga puti, taas og buhok, yagpison ang panglawas ug nagmaong pants.
Ang maong babaye may tulo ka samad pinusilan sa ulo nga maoy nakaingon sa hinanali niining kamatayon.
Base sa pasiunang imbestigasyon ni SPO3 Jesus Jimenea sa Crime Against Persons desk (Homicide) sa kapolisan sa Lapulapu gidudahang duha na ka adlaw’ng patay ang biktima tungod kay nagsugod na pagkadugta ang kalawasan ug nanimaho na.
Usa ka Roberto Orat, 55, residente sa maong dapit maoy nakakita sa maong patay’ng lawas mga alas 6:50 kagahapon sa buntag sa dihang buot unta kining motubag sa sugo sa lawas sa kasagbutan sa maong dapit.
Matud pa ni Jimenea walay bisan unsang timailhan nga maila ang biktima, nagduda usab silang posibleng igo lamang kining gilabay sa maong dapit ug sa laing lugar kini gipatay.
Apan adunay residente nga giilang si Pelmar Lenares, 36, ang mibutyag nga niadtong Hunyo 19 pasado alas-11 sa gabii nakadungog sila og tulo ka buto samtang nag-inom, nagtuo lang sila nga pabuto lang kini maong wala nila kini panumbalinga.
Ang kapolisan wala usab makaestablisar kun ang motibo pagpanulis ba o pagpanglugos ang tuyo sa mga wala pa mailhing mga kriminal.
Si Insp. Zenaido Pastorfide ang hepe sa Homicide Section sa Lapulapu mirekomendar sa pagpaubos sa biktima sa awtopsiya aron masayran kung wala ba kini panamastamasi sa wala pa kini patya.
Nanawagan karon ang kapolisan sa publiko kung dunay na-missing nga babayeng kabanay sa pagsusi sa Cosmopolitan Funeral Homes sa dakbayan sa Lapulapu aron sa pagsusi sa nakaplagang babaye. (EIM) (BANAT NEWS)