CEBU, Philippines - Gipaundang dayon ni 6th district Congressman Gabriel Luis “Luigi” Quisumbing ang pagpanghatag og medical assistance ngadto sa mga pasyente sa sixto distrito nga nalandig sa Eversley Child’s Sanitarium sa barangay Jagobiao siyudad sa Mandaue.
Kini human masakpi sa iyang buhatan nga may gipalusot nga mga medical assistance ngadto sa bugos o dili eksistido nga mga ngalan sa mga pasyente.
Suma pa ni Congressman Quisumbing sa interview sa DyRF nga giapil usab niya sa pagsuspenso ang iyang coordinator nga nasakpan usab nga nalambigit sa nahisgutang anomaliya human niya makita ang mga dokumento ug mga rekord sa iyang buhatan ug sa hospital.
Hinuon si Quisumbing nagdumili una sa pagtug-an sa ngalan sa gisuspenso nga coordinator.
Matud pa ni Quisumbing nga wala siyay giila , bisan kinsang tawhana basta masakpang moabuso ug mowaldas sa kwarta sa katawhan sa sixto distrito. Iya kining silotan.
"We will not spare anybody who has allegedly misused any funds," segun pa ni Quisumbing.
Si Quisumbing miingon nga iya dayong gihimoan og lakang ang maong anomaliya aron maundang ang maong binuang kay ang pundo sa iyang buhatan kuwarta ra usab kini sa mga magbubuhis hinungdan nga gusto siyang mahatagan og tinuoray nga serbisyo ang katawhan sa iyang distrito.
Giklaro hinuon ni Quisumbing nga ang iyang medical assistance magpadayon bisan pa man sa maong kontrobersiya apan ubos na kini sa mas inistrikto ug makuting pagsusi pagsiguro nga ang makapahimulos sa iyang health program kadto gyung mga tinuoray nga pasyente nga nanginahanglan og tabang.( WC) (BANAT NEWS)