BOC official gibalhin kay wa modawat sa suborno?

CEBU, Philippines -  Mga opisyal sa Bureau of Customs-Cebu nga nakadakop sa balor P15 milyones nga gipayuhot nga “Black Fan Coral” niadtong milabay’ng bulan ang gimandoang ibalhin ngadto sa Davao.

Apan ang maong mga opisyal nasagmuyo sa maong kamandoan ug nagdudang posibleng adunay mga dagkong opisyal sa BOC didto sa kaulohan nga may kalambigitan niini. Ang gihulipan sa iyang katungdanan mao si Capt. Jerry Arizabal ang District Commander sa Customs Police Port of Cebu ug ibalhin kini ngadto sa Davao.

Adunay nanggawas nga dili kompirmadong report nga adunay dakong opisyal sa BOC-Cebu nga mitanyag og P2 milyones suborno kang Arizabal ug sa iyang mga sakop nga sila si Special Agent II Rico Mongaya, SA II Andie Catre ug SA1 Jeffrey Alindogan bugti nga palutson lang ang maong mga corals. Ang giingong suborno ilang gibalibaran.

Tungod sa maong report ang ubang mga opisyal sa BOC-Cebu nanawagan kang Senador Miguel Zubiri sa paghimo og imbestigasyon sa BOC-Cebu official nga giingong misuway sa pagsuborno nila ni Arizabal.

Si Arizabal gikatakdang ibalhin karong adlawa sa Port of Davao samtang ang mohulip kaniya mao si Capt. Isidro Estrera gikan sa Port of Cagayan de Oro kinsa moretiro na sa sunod tuig.

Gikasagmuyo ni Capt. Arizabal ug mga kaubanan ang nahitabo kanila nga daw gisilotan sila bisan sa maayo nilang nabuhat. (BANAT NEWS)