Duha gi-ambush patay

CEBU, Philippines -  Patay ang duha ka managhigala nga giambusan sa wala mailhing tawo samtang luwan ang mga biktima sa motorsiklo niadtong Domingo sa gabii didto sa sitio Iayakan sa barangay Poblacion 1 sa lungsod sa Malabuyoc.

Ang mga biktima giila sa kapulisan nga mao sila si Ricardo Sabac, 55, taga barangay Poblacion II, maoy drayber sa motorsiklo kinsa nakaangko’g samad pinusilan sa iyang aping ug milapos ang bala sa iyang liog, samtang ang back rider niini nga si Augustine Gonzalgo, 60, sa barangay Armeña ug kanhi gwardya nakaangkon usab og daghang samad pinusilan sa kalawasan.

Ang duha ka biktima gideklarar nga dead on arrival (DOA) sa Mariano Jesus Cuenco Memorial Hospital human gidali paghatud sa mga residente sa dapit.

Si Senior Inspector Amadeo Roldan Pepito, hepe sa Malabuyoc Police Station nagkanayon nga si Sabac ug Gonzalgo paingon sa barangay Armeña sakay sa Honda XRM 125 gikan sa Poblacion.

Apan sa dihang pag-abot sa mga biktima sa ngitngit nga bahin sa maong lugar kalit silang giambusan sa wala pa mailhing mamumuno.

Nadunggan sa mga residente ang mga buto sa armas maong dali nila kining gisusi ug maoy ilang nakit-an ang mga biktima nga pulos na mga samaron.

Ang kapulisan sa lungsod daling mipahigayon og road block ug hot pursuit operation apan pakyas sila pagsikop sa mga mamumuno nga giingong sakay og motorsiklo.

“Bukid na kaayo wala pa gyu’y suga,” sumala pang Pepito paghulagway sa lugar diin mahitabo ang krimen. Pakyas usab ang kapulisan pagkuha og dugang kasayuran sa maong hitabo sanglit ang mga residente sa dapit nagdumili paghatag kanila og impormasyon.

“Tak-om ra ang mga tawo, dili ganahan mo-kooperar,” matud pang Pepito. Ang kapulisan nakarekober og usa ka deformed slug sa wala pa matinong bala sa armas diha sa crime scene.

Sumala pa ni SPO3 Ariel Mascardo nga si Agustin bangkero sa mga hantakan gikan sa lungsod sa Badian kutob sa Santander ug posibleng giinitan ug gidumtan kini sa pipila ka sugarol.

Dugang impormasyon ni Mascardo nga adunay mga residente sa barangay Cerdeña nga bukirang barangay gihapon sa maong lungsod ang mibutyag nga aduna silay nasigpatang duha ka lalaking nagsuot og bonnet nga milabay sa ilang barangay sa wala pa mahitabo ang ambush.

Gisusi na nila karon ang posibilidad nga dunay mga nakaila sa mga mamumuno sa maong barangay. (EIM) (BANAT NEWS)