May deperensya sa pangisip nalumos

CEBU, Philippines - Patay nang napalgan ang usa ka 42-anyos nga babaye nga may deperensiya sa pangisip nga nag-utaw-utaw sa kadagatan didto sa barangay Pulangbato, sa siyudad sa Bogo sa miaging buntag.

Si Sidra Yoson Bostrillo, 42, dalaga, molupyo sa Sitio Ibabao, barangay Dayhagon lungsod sa Medillen wala dayon hiilhi sa mananagat nga maoy nakabangal sa iyang lawas.

Si PO3 Allan Dosdos, imbistigador sa Bogo City Police mibutyag sa Banat News nga ang patay’ng lawas giguyod sa mga mananagat sa baybayon ug gi-report dayon ngadto sa kapolisan ug dihang didto na kini sa punerarya ang mga tagtungod na maoy miila niini.

Si Mency Bostrillo nga igsoon sa biktima maoy mitug-an sa kapolisan nga may kakulian sa pangisip ang naulahi busa gibantayan nila kanunay nga dili molakaw og layo.

Apan niadtong Hunyo 15 sa gabii kalit lang kining nawala sa ilang balay hangtod nga nasayran nalang nila nga patay na.

Kombinsido ang mga kabanay ingon man ang city health officer sa Bogo nga pagkalumos ang gikamatyan niini ug walay foul play ang iyang kamatayon. (BANAT NEWS)