Quisumbing supak sa RH Bill

CEBU, Philippines - Gitumbok ni 6th district Congressman Gabriel Luis Luigi Quisumbing nga daghan siyang question sa mga probisyon sa gipanday nga Reproductive Health (RH) Bill hinungdan nga supak usab siya sa pagpasar niini.

Sumala pa ni Quisumbing nga ang iyang kapakyas sa pagtambong sa gipatawag nga luncheon meeting ni Cebu Archbishop Jose Palma niadtong nakalabay nga adllaw wala nagpasabot nga wala siya mouyon sa baruganan sa simbahan.

Iyang gipahibawo nga nag-una-una lamang siya sa pagpakigtagbo kang Bishop Palma sa wala ang luncheon meeting nga gitambongan ni Gobernador Gwendolyn Garcia ug sa pipila ka mga kongresista ug uban pang mga lokal nga opiysales sa kagamhanan dinhi sa Sugbo ug mipahibawo na siyang daan ngadto kang Palma sa iyang baruganan kalabot sa RH Bill.

Kini tungod kay niadtong adlaw nga gipatawag ni Palma ang mga politikong Sugboanon didto siya sa Manila kay mitambong siya sa hearing sa House Committee on National Defense kalabot sa isyu sa Spratly Islands nga giilugan karon sa China, Pilipinas ug ubang mga nasud sa Asia.

Gipahibawo usab ni Quisumbing nga usa siya sa mo-interpolate sa pagtuki unya sa maong balaodnon didto sa plenaryo sa ubos balay balaoranan.

Usa sa iyang tukiun kun tinuod ba ang probisyon nga maminusan ang maternity mortality rate kun ipasar ug ipatuman ang RH bill.

Laing tukion ni Quisumbing mao ang sex education sa mga kabataan nga nagtungha pa lamang sa elementarya, apan nagdumili sa paghatag si Quisumbing sa dugang pa niyang isyu nga ipalanog niya unya sa panahon sa interpolation. (WC)(BANAT NEWS)