Luigi nanghatag tambal

CEBU, Philippines - Gipangunayan ni 6th district Congressman Gabriel Luis Luigi Quisumbing ang pagpanghatag og medical kit kon mga tambal alang sa mga senior citizen (SC) sa siyudad sa Mandaue kagahapon sa buntag didto sa Norkis Park sa siyudad sa maong dakbayan.

Mikabat sa kapin 100 ka mga (SC) senior citizen gikan sa mga nagkalainlaing barangay sa maong siyudad ang mitambong sa gipahigayong Senior Citizens Wellness Program (SCWP) nga gipasiugdahan ni Quisumbing.

Matud sa kongresista sa ika-unom nga distrito sa lalawigan sa Sugbo nga ang maong kalihokan pasiuna lamang kini sa gilusad nga SCWP sa tibuok sixto distrito.

Miingon si Quisumbing nga gawas sa mga tambal nga gihatag sa iyang buhatan, may physical exercise usab siyang ihatag ngadto sa mga hingkod na ang panuigon.

Samtang iya usab nga gipahibawo nga nagpadayon siyang nakig-alayon sa mga partylist nga nagpanday og balaodnon sa paghatag og katungod sa mga SC sa benipisyo nga angayan lamang ihatag kanila ilabina na ang medical assistance.

Dugang pa ni Quisumbing nga gusto siyang mapahimuslan sa katigulangan ang mga programa sa kagamhanan ilabina ang alang sa maayong panglawas. (BANAT NEWS)