P30M nga transaksyon sa mga barangay kuwestiyonable - COA

CEBU, Philippines - Dul-an sa P30 milyones nga mga transaksyon nga gisudlan sa mga barangay ngadto sa siyudad ang giingong walay disbursement vouchers ug uban pa nga mga dokumento nga makasuporta sa transaksyon.

Kini maoy hinungdan nga nakakuha sa atensyon sa Commission on Audit (COA) nga misusi kung unsa kabalido ang mga proyekto ingon man usab ang pagkuwestiyon sa legalidad sa transaksyon.

Ang COA mipadala na og report ngadto sa mga barangay sa resulta sa audit sa accounts ug operasyon sa mga barangay sa duha ka period nga natapos niadtong December 31, 2009.

Sama sa barangay Pasil, aduna kini nagkadaiyang transaksyon nga miabot ngadto sa P9.040 milyones apan wala makapakita og “approved disbursement vouchers” ug uban pa nga papeles sa tuig 2008 ngadto sa 2009.

Ang barangay Suba dunay disbursed funds nga P5.7 milyones; Banilad dunay P3.7 milyones; Agsung-ot nga dunay kuwang nga dokumento nga mokabat sa P221,397; Sawang Calero naka-release og P3.757 milyones; Sirao nga naka-relase nga walay vouchers nga moabot ngadto sa P37, 730 ug ang dili kompleto nga mga dokumento nga moabot ngadto sa P457,468; San Antonio dunay P3.7 milyones ug San Roque dunay P1.068 milyones nga walay approved vouchers ug uban pang supporting documents.

Naobserbahan sa COA nga ang pag-isyu og tseke nga walay disbursing vouchers ug supporting documents maoy nakaingon sa ilang pagkuwestiyon sa maong mga transaksyon sa barangay.

“The absence of approved disbursement vouchers and supporting documents will create doubt as to the validity, propriety and legality of the transactions,” tipik sa written report sa COA.

Base sa Section 4.6 of Presidential Decree No. 1445 nga kinahanglan nga duna gyu’y kompleto nga dokumentasyon ang pag-release og pundo sa gobiyerno.

Atol sa ilang eksaminasyon sa Sirao, nasuta nga nagkuwang ang supporting documents sa na-release nga vouchers. Naobserbaran usab nga ang vouchers wala mapirmahe sa haom nga tawo nga mopirma niini.

Samtang mirekomendar na ang COA ngadto sa City Accounting Office nga pugngan una ang mga honorariums sa mga opisyales ug empleyado sa maong walo ka barangay ug mabalik lang kini kung ila na nga masumite ang supporting documents nga ilang gipangita.

Kung ang barangay dili makahatag sa gipakita nila mga dokumento, dili na motugot ang COA nga maka-release og dugang mga tseke sa nagkadaiya nila nga transaksyon. (BANAT NEWS)