CEBU, Philippines - Samdan ang usa ka 24-anyos nga dalaga human kini dunggaba sa iyang kapuyo nga tindero og butong didto sa barangay Sto. Rosario, dakbayan sa Bogo sa miaging Huwebes sa hapon.
Ang biktima mao si Jonalyn Assis, 24, dalaga, apan adunay kapuyo, lumad nga taga Camarines Sur apan kasamtangang nagpuyo sa Sto. Rosario.
Samtang ang suspek mao ra usab ang iyang kapuyo nga si Clerk Anthony Alfanta, 25 , ulitawo ug lumad nga taga siyudad sa Toledo ug usa ka tindero og butong.
Si PO2 Rosalie Arnoco sa Womens’ Desk sa Bogo City Police mibutyag sa Banat News nga ang biktima ug ang suspek taud-taod nang nagbuwag tungod sa ilang personal nga problema.
Matud pa wala na mopuyo sa ilang balay ang biktima ug samtang didto kini sa balay sa iyang higala nga babaye sa nahisgutang lugar naabtan kini sa suspek diin sila naglalis tungod sa hugot nga pagbalibad sa biktima nga mopauli sa ilang balay.
Kini tungod kay nakahukom na ang biktima nga makigbuwag na gyud siya sa suspek nga maoy hinungdan sa pagsilaob sa kapungot sa naulahi.
Unya gisumbag sa suspek ang biktima ug wala pa matagbaw gihansakan sa iyang kutsilyo ang tiyan sa biktima.
Ang biktima daling gihatod ngadto sa Verallo District Hospital apan gi-transfer kini sa tambalanan sa dakbayan sa Sugbo.
Hinuon ang suspek nadakpan usab dayon sa mirespondeng mga polis ug nagtingkagol na karon sa karsel samtang nagpaabot sa tukmang sumbong nga ipasaka batok kaniya.(WC) (BANAT NEWS)