Gwen molarga paingon sa South Korea karon

CEBU, Philippines -  Molarga si Gobernador Gwendolyn Garcia ngadto sa South Korea karong adlawa, Hunyo 19, 2011.

Kini aron tambungan niya ang importante kaayong kalihukan didto sa duha ka   labing dakong siyudad sa nasud sa South Korea nga mao ang Seoul ug Busan.

Matud pa sa gobernadora nga usa sa tinguha niya sa pagbisita sa duha ka mga lugar sa habagatang Korea uban sa mga opisyal sa lokal nga kagamhanan sa dakbayan sa Naga, ning lalawigan mao ang pagsinati   sa planta sa copper sa maong mga dakbayan nga susama ra sa gipadagang Korean Electric Power Corporation ( KEPCO) sa dakbayan sa Naga.

Gipasabot ni Gobernador Garcia nga iyang pakuyogon ang mga opisyales sa dakbayan sa Naga sa tumong aron personal nilang masaksihan ang ka-epektibo ug kasakar sa panginahanglan sa kalikopan sa coal power plant nga gidumala sa Kepco sa Naga karon.

Human sa Seoul, moadto usab ang gobernador uban sa mga Provincial Board Member sa ikaduhang labing dako nga siyudad sa South Korea nga mao ang Busan City.

Kini aron iyang pirmahan ang mga papeles alang sa sisterhood relationship agreement tali sa lalawigan sa Sugbo ug sa nahisgutang dakbayan.

Sumala   sa gobernador nga pinaagi niini, mailhan na usab sa international community ang lalawigan sa Sugbo nunot sa pagsulod niini ug sisterhood relationship tali sa Busan City.

Hinuon human sa maong biyahe sa gobernador, mobalik usab kini dayon sa Sugbo gumikan sa kadaghan pa niyang mga lakwunon base sa iyang mga schedule adlaw-adlaw. (/WC)  (BANAT NEWS)