Hepe sa kapolisan gihulga

CEBU, Philippines -  Nakadawat og pagpanghulga nga gipaagi sa text message ang bag-ong hepe nga nadestino sa lungsod sa Argao nga si Insp. Alejandro Batobalonos niadtong Biyernes sa alas 6:00 sa gabii.

Si Batobalonos diha sa Argao Police Station dihang nadawat niya ang text message nga nagkanayun, “ipatago lang na daan, imo pamilya sir, katultol man mi sa inyo.” Dali dayung gipa-blotter ni Batobalonos ang maong text message nga nanghulga niya nga adunay numerong 09499838968.

Gibutyag ni PO1 Renato Nacaytona, desk officer sa Argao Police dihang nahinabi sa Banat News milarga dayon ang ilang hepe kagahapon sa buntag paingon sa Cebu Police Provincial Office (CPPO) aron i-report ang maong pagpanghulga.

Usa sa gisubay karun sa imbestigasyon sa kapulisan mao ang pagkasikop sa usa ka drug suspect sa buybust operation niadtong niaging semana nga miresulta sa pagkasikop sa usa ka Allan Tapayan alyas Edgar, 44. (BANAT NEWS)