Gibiyaan sa pamilya nagbitik sa liog

CEBU, Philippines - Wala maka-antos sa tumang kaguol ang usa ka 51- anyos nga mananagat nga gibiyaan sa iyang asawa ug mga anak hinungdan nga nakahukom kini nga magpakamatay sulod sa pinuy-anan niini sa barangay Tominjao sa lungsod sa Daanbantayan niadtong Huwebes sa udto.

Ang nagpakamatay mao si Sauro Rubio Salazar, 51, molupyo ra sa nahisgutang lugar.      

Matud ni PO3 Rey Aballe sa Daanbantayan Police Station dihang nahinabi sa Banat News, ang igsuon sa namatay nga si Arnulfo Salazar mitug-an nga nakit-an nalang nila nga nagbitay na kini nga dunay higot nga pisi ang liog sulod sa pinuy-anan niini ug patay na.

Dugang nahipos nga impormasyon sa kapulisan nga daw naliso-an sa pangisip sa mga milabay’ng bulan ang namatay human mabungkag ang pamilya niini ug gibiyaan siya sa iyang asawa ug mga anak ug nag-inusara nalang nagpuyo sa ilang balay.

Matud pa ni Aballe hinay-hinay nga naguba ang pagkatawo ni Sauro tungod sa pagkabungkag sa iyang pamilya ug maoy gituohan nga nag-unang hinungdan sa pagpakamatay niini. (BANAT NEWS)