Buli ug kusog nga hangin nakapabalaka

CEBU, Philippines - Nakapabalaka karon sa mga molupyo sa barangay Labogon, dakbayan sa Mandaue ang wala pa gihapon pamutlang mga punoan sa buli nunot niining kusog nga haguros sa hangin tungod sa bagyo ug kanunay nga pag-ulan.

Kini gumikan sa nahitabong aksidente dihang natumbahan sa usa ka punoan sa buli ang duha ka panimalay sa maong barangay nga mikalas og tulo ka tawo niadtong milabay’ng semana. Aduna pay 14 ka dagkong punoan sa buli nga kinahanglang pamutlon sa maong barangay ug kini pulos nahimutang sa tunga-tunga nga bahin sa kabalayan.

Naglakip sa mga dagkong punoan sa buli nga nagkihanglan maputol mao anaa sa sitio San Jose I, sitio San Jose II ug Doña Rosario Village.

Si barangay kapitan Damaso Tumulak nga nahinabi sa Banat News miingon nga daghan na sila og naputol nga buli sa ilang dapit apan daghan pa ang nahibilin niini.

Gitataw niya nga magpatabang karon ang iyang barangay sa pagputol sa maong mga punoan sa buli sa Department of General Services sa dakbayan kinsa nakaputol na og 16 ka punoan sa miaging bulan.

Si Tumulak miingon nga mikuha na siya og grupo sa mga tawo nga makamaong mamutol niini. (BANAT NEWS)