Bugan sa sikyu naunay sa shotgun

CEBU, Philippines - Naigo ang kinatawo sa usa ka gwardya human aksidenteng nakablitan ang gatilyo sa iyang service firearm nga shotgun samtang nag-duty sulod sa compound sa W-Balio Construction nga nahimutang sa dalan D. Jakosalem sa barangay Zapatera siyudad sa Sugbu niaging alas-5 sa hapon.

Si Ricky Alferez, sakop sa Bisda Security Agency temporaryong nagpuyo sa Banawa sa barangay Guadalupe nakaangkon og samad iyang kinatawo human naigo sa splinter sa bala sa iyang armas ug anaa karun sa tambalanan.

Sa pasiunang imbestigasyon ni SPO4 Alex Dacua ug mga kauban sa Homicide Section paingon molingkod sa bangko si Alferez nga nagsabak sa iyang 12-gauge shotgun apan aksidente niya kining nakablitan ug naigo ang iyang kinatawo.

Si PO2 Jodan Batucan nga nahinabi sa Banat News nagkanayon nga aksidente gyud ang nahitabo.

Ang biktima daling gihatud sa iyang mga kauban sa Cebu City Medical Center (CCMC). (BANAT NEWS)