CEBU, Philippines - Mga tinubdan sa potable water sa sitio Campinsa, barangay Manipis, dakbayan sa Talisay nasutang positibo sa fecal organism human sa gipahigayong testing sa Cebu Provincial Health Office.
Base sa water analysis report nga gipagawas niadtong Lunes ug gilagdaan ni Yvonne Cariñosa, provincial technologist nga ang sample sa tubig diha sa Tuong Tingbanan, FVSP Cooperative ug Improve Spring nasuta nga positibo sa fecal organism.
Ang fecal organism mao ang matang sa kagaw o organismo nga namugna gikan sa ihi sa tawo ug sa mga mananap.
Wala pa hinuon matino sa mga tinugyanan sa panglawas kung ang mga tubig gikan sa nahisgutang mga tinubdan sa tubig gigamit bang imnonon sa mga residente sa barangay.
Si Konsehal Danny Caballero kinsa miyembro sa council committee on environment nagkanayon nga ang maong problema iyaha kining ipadayag atol sa iyang regular nga sesyon karong Martes.
Gawas niini makig-estorya usab siya sa city health officer nga si Dr. Lino Alanzado kabahin sa resulta sa mga sample sa tubig.
Mipahimangno si Caballero sa mga residente nga kun ingon niini kahugaw ang maong tubig peligro kini sa panglawas sa mga residenteng makainom niini.
Ang maong opisyal sa siyudad natahap nga usa sa hinungdan sa pagkapositibo sa bacteria sa tubig sa mga tinubdan sa Campinsa mao ang hugaw sa tawo tungod kay kasagaran sa residente sa lugar walay mga pansayan.
Ang Campinsa usa sa bukirang barangay sa Talisay 15 ka kilometros ang gilay-on paingon sa sentro sa Talisay ug adunay gibana-banang 2,000 ka nga residente nga diin ang uban kanila nasagmuyo tungod kay giingong mahinumduman lang sila sa mga opisyal sa siyudad panahon sa eleksiyon. (EIM)