CEBU, Philippines - Mikabat sa 400 ka punoan sa hamtong nang marijuana ug laing 500 ka mga bag-o pang tinanom ang gipanglarot sa mga sakop sa militar didto sa Sityo Liki, barangay Caurasan sa lungsod sa Tuburan sa miaging adlaw.
Si SPO4 Edgar Dumangon sa Tuburan Police Station mibutyag sa Banat News nga ang maong mga gidiling tanom nadiskobrehan sa mga sundawo sa usa ka kalibonang bahin sa nahisgutang lugar diin gihimong sekretong plantasyon sa marijuana.
Matud pa ni SPO4 Dumangon nga sa pagkakaron anaa sa ilang kustodiya ang maong mga linarot nga marijuana human kini ihatod sa mga sundawo nga nanglarot niini.
Nasayran nga nagpatrolya ang mga sakop sa Charlie Company sa 78th Infantry Battalion sa Philippine Army sa maong lugar dihang ilang nasigpatan ang plantasyon sa ginadiling mga tanom hinungdan nga wala sila magduha-duha sa pagpangibot niini. Sa maong higayon walay nasikop nga tag-iya sa maong plantasyon sanglit walay mga tawong mitug-an sa ngalan sa nagtanom niini.
Ang lungsod sa Tuburan usa sa mga lungsod dinhi sa Sugbo nga dunay giingong mga sekretong plantasyon sa marijuana nga maoy gibantayan karon sa mga otoridad. (BANAT NEWS)