Kinawat nga mga imahen nabawi

CEBU, Philippines - Nabawi sa mga awtoridad ang pipila ka imahen ni Sr. Sto Niño nga gikawat sa mga kawatan niadtong Huwebes sa kaadlawon sa gilungkab nga lima ka stalls sa baligyaanan sa mga rebolto kilid sa Basilica Menore del Santo Niño.

Kagahapon sa buntag giaresto si Joel Sargento, 34, taga sitio Mahayahay sa barangay Pasil sa mga sakop sa City Intelligence Branch (CIB) nga gipangulohan ni Chief Insp. Romeo Santander ug nabawi sa balay niini ang kapin sa napulo ka imahen sa Senyor. Giingong 28 ka mga susamang imahen ang gikawat sa tulo sa mga batan-ong kawatan nga milungkab sa maong stalls.

Si Santander nagkanayon nga ang igsuon ni Sargento maoy miabag kanila aron makuha ang mga imahen sa balay niini human madungog og maayo sa ilang lugar nga diha gibilin sa balay ni Sargento ang mga kinawat nga imahen.

Nasuta usab nga ang duha ka igsuon niini nga sila si Ralph ug Ryan ug higalang ginganlan og Buknoy maoy giingong nanglungkab sa maong mga stalls. Ang tulo padayon pang gipangita. (BANAT NEWS)