Mga piloto nabangga sa pison

CEBU, Philippines - Ubos sa obserbasyon sa mga doktor ang upat ka mga piloto nga nangaangol human mabangga ang gisakyan nila sa usa ka gi-parking nga pison diha sa Aviation Road sa barangay Basak dakbayan sa Lapulapu sa milabay’ng gabii.

Ang biktima mao sila si Capt. Paul Nino Amodia, residente sa barangay Marigondon ug Capt. Joseph Brent Chiong, taga barangay Pajac sa mao gihapong dakbayan samtang laing duha pa nila ka kauban nga naangol usab ang padayon pang giila hangtud ning pagbalita.

Ang mga naangol pulos piloto sa Far Eastern Aviation nga nahimutang sa hanger sa Mactan- Cebu International Airport (MCIA).

Sa pasiunang imbestigasyon ni PO3 Dioscoro Arong sa traffic division sa Lapulapu City Police Office nasayran nga mga alas 7:00 sa milabay’ng gabii padulong pauli ang mga piloto subay sa maong dalan luwan sa Mitsubishi Gallant nga gimaneho ni Chiong dihang kalit silang nabangga sa usa ka gi-parking nga pison ang mga biktima.

Nasuta nga ang maong pison gituohang iya sa dakbayan sa Lapulapu tungod sa Lapulapu City Seal nga napatik sa maong heavy equipment.

Tungod sa kakusog sa pagbangga nagusbat og maayo ang atubangang bahin sa awto ug naangol ang mga sakay niini, duha sa mga biktima daling gidala sa mga residente ngadto sa Mactan Doctors Hospital, samtang ang laing duha gidala usab sa tambalanan sa dakbayan sa Sugbu.

Nasuta ni Arong nga ngitngit ang maong dapit nga giparkingan sa pison. Nasuta usab nga tulo na kini ka adlaw nga naguba ug gibilin sa maong lugar.

Dugang pa ni Arong nga wala say reflectorized early warning device nga gibutang atubangan ug luyo sa maong pison nga makapasidaan unta sa ubang motorista maong nadasmagan kini sa awto sa mga biktima. (BANAT NEWS)