Delivery boy gitulis

CEBU, Philippines - Mokabat sa P20 mil   nga halin sa pan ang nasakiyo sa nagmaskarang tulisan nga mitulis sa usa ka delivery boy sa usa ka tindahan sa barangay Buanoy sa lungsod sa Balamban niadtong Miyerkules sa alas 5:20 sa hapon.

Ang biktima mao si Wilson Marilao, 53, taga barangay Labogon siyudad sa Mandaue nga delivery boy sa Grandbakery nga nagbase sa maong dakbayan.

Samtang ang responsable gihulagway sa biktima ug mga saksi nga usa ka lalaking nagmaskara ug nagsul-ob pa og helmet ug nagsakay og motorsiklo nga walay plate number.

Matud ni SPO3 Juluis Obana sa Balamban Police dihang nahinabi sa Banat News ang biktima naghatud og mga pan sa tindahan ni Elpidio Angcos sa barangay Buanoy ug samtang diha sila sa sulod sa tindahan nagbinayranay kalit nga miabot ang tulisan ug diretso og sulod sa tindahan.

Ang maong lalaki mition kanila og armas dungan sa pagdeklarar og tulis ug gimanduan ang mga biktima pag-ubo sa semento ug mikuha sa bag ni Marilao nga gisudlan sa P20 mil nga halin.

Pagkahuman daling misakay sa motorsiklo ang tulisan ug kusog kaayung mipaturatoy pahilayo.

Ang biktima ug ang tag-iya sa tindahan igo nalang sa pagpa-blotter sa maong panghitabo sa buhatan sa kapulisan.  - BANAT NEWS