City fire department kuwang og fire trucks
CEBU, Philippines - Gipahibalo ni Senior Superintendent Anderson Comar sa City Fire Department nga 18 lang karon ka fire truck ang nag-operate sa siyudad sa Sugbo ug tungod sa kadako sa siyudad ug sa kadako sa populasyon niini kuwang ra kini.
Naapil na sa maong gidaghanon ang mga fire trucks sa siyam ka fire substations sa Labangon, Pahina Central, Pari-an, Pardo, Guadalupe, Lahug, Mabolo, Talamban ug San Nicolas. Sa gihimo nga pagtuon sa maong departamento 29 unta angay nga gidaghanon sa fire truck sa dakbayan.
Giangkon hinuon ni Comar nga bisan sa kagamay sa ilang mga kahimanan, ilaha gihapon nga gipaningkamotan ang kalidad sa serbisyo panahon sa emerhensya.
Gipakagamay lang ni Comar kung duna siya’y madawat nga mga pagsaway basta nakatutok lang gyud siya sa iyang trabaho.
Sumala pa niya nga nagkuwang ang budget sa gobyerno busa dili sila basta-basta nga makapalit dayon sa ilang mga gikinanglan nga ekipo alang sa ilang operasyon.
Samtang mipadangat na og request si Comar ngadto sa kagamhanan sa siyudad sa Sugbo nga nangayo og dugang fire trucks.
Sa laing bain, moabot ngadto sa kapin sa 24,000 ka mga establisamento ang inspeksyunon sa BFP dinhi sa dakbayan pagtino kung nakatuman ba kini sa fire safety standards. Gumikan sa bag-ong pagbukas sa klase unahon nila pag-inspeksyon ang mga boarding houses ug mga tunghaan. - BANAT NEWS
- Latest
- Trending
