Fernandez ug Bucao pakanaugon sa mga vendors

CEBU, Philippines - Sa nagkaduol nang pagbalhin gikan sa merkado sa barangay Tabunok, dakbayan saTalisay ngadto sa Lagtang ang mga vendors subling milusad og lihok protesta apan ning higayona ilang gipanawagan ang pagluwat sa katungdanan sa pipila ka mga opisyal sa siyudad. Gibana-banang 500 ka mga vendors sa Tabunok kinsa nagsul-ob og itom nga mga t-shirt ug nagbutang og nga puwang ribbon ang nag-rally kagahapon sa buntag diha sa paradahan sa mga traysikol sa maong dapit.

Ang maong mga vendor misinggit kining paluwaton sa katungdanan sila si Mayor Socrates Fernandez ug Bise Mayor Alan Bucao. Si Paul Labalan ang tigpamaba sa mga vendors ug usa usab sa naghupot og stall diha sa karnehan sa Tabunok Public Market nagkanayon nga duna pay mga sunod-sunod nga rally ang mahitabo sa pagpakita sa ilang pagsupak sa pagpabalhin nila ngadto sa bag-ong merkado sa Lagtang.

Karong Hunyo 28, 2011 gikatakda ang pagpabalhin sa mga vendor ngadto sa modernong merkado publiko sa barangay Lagtang nga giinsister sa mga vendors nga makaapektar sa ilang panginabuhian.  - BANAT NEWS