10 driver positibo sa illegal drugs

CEBU, Philippines - Napulo ka mga drayber ang nagpositibo sa paggamit og ginadiling drugas sa gihimong surprise road drug testing sa Land Transportation Office kagahapong adlawa diha sa dalan Imus sa barangay Day-as ning dakbayan.

Sa report sa Balitang Bisdak, nasayran nga upat ka taxi drayber, lima ka drayber sa pasaheroang jeep ug usa ka drayber sa JT Express V-hire ang napositibo sa drug test.

Matud pa ni LTO-7 Regional Director Raul Aguilos nga ila kining gihimo aron masuta kun aduna bay mga driver tiggamitan og ginadiling drugas.

Midugang si Aguilos nga kanunayon na nila ang paghimo og susamang operasyon kini sa tuyo usab nga malikayan ang mga disgrasya tungod sa mga adik nga mga drayber.

Mipasabot usab si Aguilos nga pugngan nila ang mga lisensya sa maong mga drayber samtang ila pang gipadala ang sample ngadto sa kaulohan alang sa confirmatory test.

Butyag pa ni Aguilos nga makuha lang sa drayber ang ilang lisensya kini kun mapamatud-an nga mag-negatibo sila, apan kadtong makompirmar ipaubos dayon sa rehabilitation.  - BANAT NEWS