Gidudahang tulisan nakuhaan og armas
CEBU, Philippines - Naimbargo sa kapolisan ang kalibre .38 nga pusil nga dunay mga bala gikan sa usa ka batan-ong lalaki nga ilang nadakpan sa miaging gabii diha sa puj terminal sa barangay Pajo, dakbayan sa Lapu-Lapu.
Si PO1 Gilbert Alolor sa Presinto 3 sa Lapu-Lapu City Police Office (LLCPO) miila sa nadakpan nga si Gerome Comahig Salazar, 22-anyos, ulitawo lumad nga taga lungsod sa Tabogon.
Matud ni PO1 Alolor nga si Inspector Gerald Suquib maoy nangulo sa pagtubag sa alarma dihang nakadawat sila og tawag sa telepono gikan sa usa ka concern citizen.
Gidudahan nga posibleng manulis sa mga pasahero sa puj ang suspetsado apan demalas kay nasigpatan kini sa mga estambay sa maong dapit.
Dugang pa ni PO1 Alolor nga si Salazar nga nakakita sa ilang pag-abot sa maong dapit daw gibati og kakuyaw ug mikaratil og dagan.
Nahitabo ang pipila ka gutlo sa paggukod sa mga polis ngadto sa suspetsado una pa nila kini masikop.
Si Salazar gipangayoan og dokumento sa mga polis sa gidala niining pusil apan wala kini makapakita hinungdan nga gisignit kini ug gitanggong sa karsel sa presento 3.
Si Salazar mag-atubang og kasong illegal possession of firearms. (BANAT NEWS)
- Latest
- Trending
