Arts Center gisusi ni Gwen

CEBU, Philippines - Personal nga gi-inspection ni Gobernador Gwendolyn Garcia ang Cebu Performing Arts Center (CPAC) nga nahimutang sulod sa University of the Philippines (UP) Cebu campus sa barangay Lahug ning dakbayan sa Sugbo sa miaging adlaw.

Kini aron pagsiguro nga mahuman na ang maong proyekto niining tuiga pinaagi sa paningkamot sa buhatan sa kagamhanan sa lalawigan sa Sugbo.

Matud pa ni Gobernador Garcia nga human sa iyang paglibot sa CPAC   nasuta niya nga anaa na sa 85 porsento ang kahumanan sa maong proyekto.

Sigun sa gobernadora nga iyang gipaabot nga mahingpit ang maong proyekto sa sunod bulan aron may magamit na ang probinsiya ug ang siyudad sa Sugbo nga performing arts center alang sa cultural presentation ug uban pang kulturanhong mga kalihukan.

Hinoon mosusi pa pagbalik ang gobernador sa nahisgutang edipisyo karong sunod semana aron pagsuta sa dugang kalambuan sa nahisgutang proyekto sa Kapitolyo nga dul-an na sa 20 ka tuig wala gyud mahuman sa mga nanglabay nga mga gobernador. (BANAT NEWS)