Kauban sa gipatay'ng amang giimbistiga

CEBU, Philippines - Mipakita na kagahapon ngadto sa kapolisan ang kauban sa babayeng amang ug bongol nga gilugos ug gipatay didto sa Brgy. Basak dakbayan sa Lapulapu sa milabay’ng Sabado sa gabii. Ang miatubang sa kapolisan mao si Annabelle (apilyedo gitago) residente sa Sitio Suba Masulog, Brgy. Basak dakbayan sa Lapulapu suod nga higala sa biktima nga si Cherame Gitgano. Matud pa ni Lapulapu City Police Office Director Sr. Supt. Anthony Obenza nga segun sa gitug-an ni Annabelle nasayran nga sa wala pa mawagtang ang biktima gikan sa diskohan sa Sitio Suba Masulog, Brgy. Basak dakbayan sa Lapulapu, nakainom kini og ilimnong makahubog ug mikuyog kini sa usa ka lalaki nga gituohan niyang igo lang manayaw   sa diskohan.

Apan paglabay sa pipila ka oras wala na kini mahibalik busa nagduda si Annabelle nga miuna kini sa pagpauli. Ang kapolisan mipahulagway kang Annabelle sa hitsura sa suspetsado alang sa cartographic sketch niini.

Samtang gibasol si Annabelle sa mga paryente sa biktima nga maoy hinungdan   sa kamatayon sa dalaga.

Si Sr.Supt. Obenza naglaum nga pinaagi sa maong kalamboan mailhan nila ang responsable sa maong krimen. (BANAT NEWS)