Israeli gipatay sud sa hotel

CEBU, Philippines - Usa ka langyaw kansang agtang may samad sa bala napalgang patay sa miaging gabii sulod sa hotel nga iyang gipuy-an ning dakbayan sa Sugbo kansang lawas giputos og habol ug gipasok ilawom sa katre.

Ang biktima nailhan nga si Max Efergan, 75, nga taga Morocco, Israel, apan nag-abang kini og lawak sa usa ka hotel sa dalan Colon, ning dakbayan.

Nadiskobrehan ang kamatayon sa maong Israeli   dihang mitulo ang dugo niini ug milusot sa pikas lawak.

Nagpabilin pang blangko ang kapolisan bahin sa mga kriminal nga mipatay sa biktima kinsa ilang gidudahan nga gitulis kay nangawagtang na ang mga personal nga butang niini gawas lang sa iyang traveling bag nga gisudlan sa iyang mga sapot.

Sa pasiunang imbestigasyon ni SPO4 Rey Cuyos ug mga kaubanan sa Homicide Section nagbutyag nga ang biktima miabot sa maong hotel sukad pa niadtong Enero 2 niining tuiga.

Ang unang nakadiskobre sa iyang kamatayon mao si Rodulfo Padin Pizon, 48, usa ka roomboy sa hotel, ug si Neniel Belotindos, 21, guwardiya sa Bisda Security Agency kinsa maoy misusi sa lawak sa biktima gumikan sa reklamo ni Nita Pimentel, ang ukopante sa tapad nga lawak nga giabangan sa biktima bahin sa kabahong patay sa dugo nga milusot sa iyang lawak gikan sa lawak sa langyaw.

Nakurat si Pizon ug Belotindos dihang nasuta nila nga ang biktima giputos na og habol nga gipasok ilawom sa iyang katre kansang agtang may samad pinusilan nga maoy gituohan nilang nakaingon sa kamatayon niini, hinungdan nga nanawag dayon sila og polis.

Si Efergan katapusang nakita sa taga hotel niadtong Hunyo 13 sa tungang gabii nga misulod sa iyang lawak nga nag-inusara gikang misuroy sa gawas kauban si Katz Nathan, 63, taga Haifa, Israel nga higala sa biktima, kinsa nag-abang usab sa room 311 sa Ruftan Hotel sa dalan Pelaez, dakbayan sa Sugbo.

Gawas sa samad pinusilan sa agtang, nasuta usab dihang gisusi sa kapolisan nga nagupok ang mga bukog sa tingkoy niini nga nakapaduda usab kanila nga gibunalan kini og gahing butang.

Napunit sa kapolisan   ang mga butang sa biktima sulod sa lawak niini mao ang usa ka cell phone, pula nga traveling bag, usa ka itom nga traveling bag ug laing itom nga bag.

Nakita usab nila ang usa ka pitaka nga wala nay sulod, ID sa Bureau of Immigration, Korean Air Skypass ID Card ubos sa iyang ngalan, laing Korean Air Skypass Morning Calm ID nga may ngalang Nissim Moyal.

Si PO2 Ruth Violango, imbistigador sa Homicide Section sa kapolisan ning dakbayan mibutyag sa Banat News nga tulis ang gitan-aw nilang motibo sa kamatayon sa biktima sanglit nakuha nila ang battery pack sa laptop, apan wala na sila makakita og kuwarta.

Midugang si Violango nga nakig-alayon sila karon sa Isreali Consul tungod kay wala nila hikit-I ang passport sa biktima nga mao untay lig-on kaayong mopamatuod sa tinuoray nga ngalan sa biktima.

Si Efergan gitakda untang mopauli na sa iyang nasud karong Hunyo 30, 2011.

Si Ali Bermoy, usa ka roomboy mibutyag sa mga tigbalita nga gipalimpyo pa siya sa lawak sa biktima niadtong Sabado.

Si Rolando Roblon, desk officer sa hotel nagkanayon usab nga katapusan niyang nakit-an ang biktima niadtong Sabado, apan nianang pagka-Lunes hangtod Martes wala na siya makakita niini nga unta matag buntag mangayo man kini kaniya og ice. Tungod niini miingon si Violango nga imbistigahon nila ang tanang empleyado sa maong hotel ilabi na niadtong mi-duty niadtong mga adlaw sa wala pa madiskobrehe ang patay’ng lawas sa biktima aron makakuha sila og kasayoran nga maggiya kanila sa pagtumbok sa mga kriminal. (WC) (BANAT NEWS)