Mga buli sa Mandaue pamutlon

CEBU, Philippines -  Giklaro sa kapitan sa barangay Labogon sa dakbayan sa Mandaue nga si Damaso Tumulak nga hagbay ra nilang gisugdan ang pagpamutol sa mokabat 50 ka punoan sa buli sa ilang barangay sa wala pa mahitabo ang trahedya nga duha ka panimalay ang nadat-ugan nga nakaingon sa kamatayon sa tulo ka tawo.

Si Tumulak nga nahinabi sa Banat News kagahapon miingon nga dili madali ang pagputol sa mga buli tungod kay nagkinahanglan man kini og salapi gikan sa ilang panudlanan.

Matud pa ni Tumulak nga mokabat sa P6,000 ngadto sa P4,000 ilang magasto sa pagputol sa matag dakong punoan sa buli nga pipila na niini anaa mahimutang sa mga pribadong luna.

Gitataw ni Tumulak nga gihimo na nga panginabuhian sa mga katigulangan sa maong dapit hangtod karong panahona ang lanot sa buli nga makuha gikan sa palwa nga maoy himuong silhig nga lanot.

Apan gumikan sa trahedya gikinahanglang ilaha na gyud kining ipaputol paglikay nga aduna pay laing madat-ugan kun matumba kini.

Nasuta nga ang buli ang mikalas sa magtiayong sila si Romeo ug Teresa Dimpas ug Richard Gerodias.

Ang barangay mihatag na og hinabang nga P5,000 sa mga nailo sa nangamatay samtang gipaabot nga motunol usab og hinabang ang dakbayan ngadto sa mga biktima. (BANAT NEWS)