CEBU, Philippines - Naalarma kagahapon sa buntag ang mga kawani sa post office sa Cebu City Hall human lungkaba sa wala pa mailhing tawo ang pipila ka mga drawer sa maong buhatan ug nakuha gyud ang P6,000 nga salapi.
Nasayran nga miagi sa bintana ang kawatan nga wala mamatikdi sa mga gwardiya ug mga sakop sa Civil Security Unit (CSU).
Si Daryl Mabini sa CSU nagdudang inside job ang nahitabo sanglit suhito kaayo ang kawatan kung asa gibutang ang salapi, laing sakop sa CSU nga si Nelson Poblete nagkanayon nga ikatulo na ka higayon nga gilungkab ang maong buhatan.
Ang hepe sa Theft and Robbery Section sa Cebu City Police Office nga si Chief Insp. Bonifacio Garciano nagkanayon nga padayon karon ang gihimo nilang pakisusi sa maong insidente. (BANAT NEWS)