CEBU, Philippines - Usa ka fetus nga gibana- banang may tulo ngadto sa upat pa ka buwan sa taguangkan sa usa ka inahan ang napalgang gisalibay didto sa menteryo publiko sa Sitio Bahac, barangay Poblacion lungsod sa Liloan kagahapon sa alas 6:10 sa sayong buntag. Si SPO1 Caludio Castro Jr. sa Liloan Police Station nga maoy nangulo sa mga miresponde nga polis mitataw nga naabtan nila sa maong dapit ang usa ka plastic nga sudlanan og ice cream nga maoy gisudlan sa maong puya nga baho na.
Subay sa inisyal nga imbistigasyon nga gihimo sa mga polis sa duha ka mga bata nga maoy nakakita sa maong puya, nga samtang namunit sila og opos sa kandila sulod sa menteryohan, nasil-ingan nila ang usa ka plastic nga may batang gamay nga patay na sa sulod niini.
Si SPO4 Remegio Elacion ang desk officer sa Liloan Police Station mibutyag sa Banat News nga gipalubong dayon nila ang maong puya sa menteryohan sa lungsod.
Nasayran sa kapolisan gikan sa mga molupyo nga duol sa menteryohan nga nakakita sila og babaye ug lalaki sulod sa menteryohan sa sayong kagabhion sa milabay’ng adlaw kinsa gidudahan nilang maoy responsabli nga milabay sa maong fetus. Ang kapolisan padayon pa sa ilang imbistigasyon pagtumbok sa ginikanan sa maong puya. (BANAT NEWS)