Kolurom nga school bus panakpon

CEBU, Philippines -  Gipahimangnoan sa kadagkuan sa Land Transportation Office (LTO-7) ang mga ginikanan nga dili magpataka og kontrata niadtong mga pribadong sakyanan nga maoy magsilbing school bus sa ilang mga anak.

Gibutyag ni Atty. Vicente Gador, ang hepe sa operations branch sa LTO-7 dihang nahinabi sa Banat News gihugtan karun nila ang monitoring ug surveillance niadtong mga pribadong sakyanan nga gi-negosyo isip school bus nga walay prangkisa.

Gipasabot ni Gador nga dili gyud kalikayan nga mokuha sa serbisyo sa maong mga sakyanan ang mga ginikanan tungod usab sa kahamugaway unya sa pagbiyahe sa ilang mga anak ngadto sa tunghaan ug pabalik sa ilang balay.

Apan giklaro ni Gador nga kung walay prangkisa mahimo nilang dakpon ang maong mga sakyanan ug pamultahon og P6 mil pesos ug i-impound ang sakyanan.

Hinuon irekomendar nila ngadto sa operator nga kinahanglang molukat gyud sila og prangkisa gikan sa Land Transportation Franchising and Regulatory Board (LTFRB-7). (BANAT NEWS)