Website sa City Hall way sud

CEBU, Philippines - Giangkon sa hepe sa Management Information & Computer Services (MICS) sa Cebu City Hall nga si Engineer William Artajo nga dili aktibo sa paghatag og detalye sa ilang report ang pipila ka departamento sa siyudad hinungdan nga minos kaayo ang unod sa website sa kagamhanan sa dakbayan sa Sugbo. 

Nasayran nga may mga tigpaniid nga wala mahimuot gumikan sa ka minos og impormasyon sa website sa siyudad nga unta ilado man nga lugar ang dakbayan sa Sugbo.

Dugang pa ni Artajo nga ang trabaho sa ilang departamento mao lang ang paghupot sa sistema sa website samtang ang mga detalye sa mga kasayoran naggikan sa inisyatibo sa matag departamento.

Nagdumili hinuon si Artajo sa pagtug-an kung unsa nga departamento ang dili aktibo sa paghatag og detalye sa mga kasayorang angayan nilang ihungit ngadto sa website.

Nasayran nga ang Department of Veterinary Medicine and Fisheries maoy usa sa mga departamentong aktibo mopadala og report sa website hinungdan nga daghan gyud ang masayod sa mga kalihukan sa maong departamento.

Samtang ang Public Information Officer sa siyudad nga si Carlo Dugaduga misaysay nga ila na karong gisugdan ang pagpakuha og mga impormasyon gikan sa nagkadaiyang departamento sa City Hall aron daling masayran sa mga tawo ang ilang mga accomplishment report.  (BANAT NEWS)