Quisumbing mihimakak sa pahayag ni Cortes

CEBU, Philippines - Gipanghimakak ni 6th district Congressman Gabriel Luis Luigi Quisumbing ang napublikar nga pamahayag ni Mandaue City Mayor Jonas Cortes nga siya miuyon na nga mopalabang og balaodnon nga maghimo sa siyudad sa Mandaue nga Lone Congressional District human sa ilang panagtagbo niadtong nakalabay nga semana.

Suma pa ni Quisumbing sa interview sa DyRF Radyo Fuerza nga dili tinuod nga mipasalig siya kang Mayor Cortes nga moduso sa nahisgutang balaodnon kay iya pang konsultahon ang mga kauban niyang opisyales sa One Cebu Party. Subli niyang giklaro nga wala siyay pagsupak nga mahimong lone congressional district ang Mandaue sanglit dako kini ug makapadugang usab kini sa kalambuan sa maong dakbayan.

Apan iyang giklaro nga iya usab nga gilantaw ang kaugmaon ug kalambuan sa lungsod sa Consolacion ug sa lungsod sa Cordova nga dili makabarug isip usa ka distrito tungod sa kakulang sa populasyon niini.

Hinuon gitumbok ni Quisumbing nga nanghinaot siya nga na-misquoted lamang ang pamahayag sa mayor sa siyudad sa Mandaue bahin ning maong isyu.

"I hope nga misquoted lang si Mayor Jonas, because that is not totally the agreement of our talk," sigun pa ni Quisumbing.

Matud pa ni Quisumbing nga dili siya gusto nga makwestyon ang iyang pagsabot sa balaod isip principal author kun ipadayon niya ang pagpanday sa maong balaodnon.

Sigun pa ni Quisumbing nga dili na mistil nga padesisyonon ang korte sa legalidad unya sa nahisgutang balaodnon tungod kay nasayud siya nga wala mahasubay sa legal nga proseso ang pagpanday unya sa balaodnon nga mahimong lone district sa Mandaue city sanglit natala man sa batakang balaod nga way mahimong lone district nga siyudad kun ang ubang sakop sa distrito niini dili makabarug isip laing bulag nga distrito.

Dugang pa ni Quisumbing nga ang iyang pangatungdanan padayong nagbarog sa labing maayong interes sa kinabag-ang molupyo sa taga sixto distrito ug dili sa interes sa pipila lamang. (BANAT NEWS)