Mga boarding houses sa Sambag Uno nasunog

CEBU, Philippines - Mikabat sa 2 milyones ang danyos sa nahitabong sunog kagahapon sa kaadlawon sa barangay Sambag Uno ning dakbayan nga naglakip sa usa ka edipisyo sa Southwestern University.

Alas 2:40 nadawat ang maong alarma ug nakontrolar sulod lang sa 35 minutos human giisa sa 3rd alarm apan gilamoy gyud ang 20 ka panimalay nga sagad gihimong boarding houses samtang upat niini ang partially burned.

Sa pakighinabi sa Banat News ni SFO3 Jimmy Layao, fire investigator base sa ilang nakuhang impormasyon naggikan sa usa ka boarding house nga gipanag-iya sa usa ka Rosie Lambo Barrientos ang sunog.

Matud pa ni Layao nga usa sa mga kwarto naggikan ang maong sunog ug ulahi nang nabantayan sa mga nag-abang dihang nakadunggog sila og buto.

Midugang si Layao nga usa ka Lorrie Lucban ang nakadungog og pagbuto gikan sa usa sa mga kwarto sa maong panimalay ug human sa maong buto ang kalit kaayo ang pagkatap sa kalayo.

Gidudahan karon ni Layao nga electric fan maoy hinungdan sa pagkasunog tungod kay mao man kini ang nakit-an ni Lucban nga nagsiga na.

Mibutyag usab si Layao nga hinimo sa mga mixed- materials ang mga panimalay sa maong lugar maong daling mikatap ang kalayo. Samtang ang medicine building sa South- western University nga naa sa luyong bahin sa balay ni Barrientos nakan-an usab sa kalayo.

Usa ka Bobot Gacasan usab ang giingong napaso sa maong insidente. (BANAT NEWS)